Իշխանական խմբակցության ջանքերով չի ստեղծվի էթիկայի ժամանակավոր հանձնաժողով՝ քննելու լրագրող Հռիփսիմե Ջեբեջյանի նկատմամբ պաշտպանության հանձնաժողովը ղեկավարող Անդրանիկ Քոչարյանի վարքագիծը:
Ընդդիմադիրների նախաձեռնությունը իշխանությունը նախ պետաիրավական հանձնաժողովում մերժեց, «Պատիվ ունեմ»-ն ու «Հայաստան»-ը որոշեցին օգտվել կանոնակարգով ընձեռած հնարավորությունից ու որպես արտահերթ հարց բերել ԱԺ դահլիճ: Լրագրողներն էին ընդդիմությանը դիմել հանձնաժողով ստեղծելու համար:
Ընդդիմադիր «Պատիվ ունեմ»-ի պատգամավոր Թագուհի Թովմասյանը հիշեցրեց՝ լրագրողի մասնագիտական գործունեությունը խոչընդոտելն արգելվում է օրենքով. «Անդրանիկ Քոչարյանը լրագրող Հռիփսիմե Ջեբեջյանի նկատմամբ ցուցաբերել է ակնհայտ անհարգալից վերաբերմունք»:
Անդրանիկ Քոչարյանն իր հարցով քննարկմանը նախընտրեց հետևել նիստերի դահլիճում՝ բարձր տրամադրությամբ. տեսախցիկները ֆիքսել են նրա դեմքի ժպիտը:
Այսօրվա քննարկումը լրագրողների բողոքի ակցիայով ուղեկցվեց, նիստերի դահլիճի մուտքի մոտ նաև «ամոթ» պաստառն էր կախված: Միջադեպից 1.5 ամիս է անցել, լրագրողները Քոչարյանից դեռ ներողություն էին ակնկալում:
Անդրանիկ Քոչարյանը ինչպես նախկինում, այսօրվա ելույթում էլ ներողություն չխնդրեց. «Ես կրկնել եմ հայտնի հոգևորականի բառերը, որը շատ ավելի կոշտ է ասել՝ «բերանդ լվա»: Ես որևէ վիրավորական բան չեմ ասել, ես ասել եմ խոսքի մաքրության մասին»:
Հարցը ներկայացնող «Պատիվ ունեմ»-ից Թագուհի Թովմասյանը Անդրանիկ Քոչարյանի պարզաբանումը մանիպուլյացիա է որակում: Սրբազան շարժման առաջնորդներից, «Հայաստան» խմբակցությունից Գառնիկ Դանիելյանն էլ որոշեց անդրադառնալ Անդրանիկ Քոչարյանի հայտարարությանը:
«Բագրատ սրբազանը մի քանի անգամ ներողություն խնդրել դրա համար, եթե լրագրողը վիրավորվել է: Ամեն ինչի մասին խոսում եք այստեղ, բացի ներողություն խնդրելուց: Նույնը ոնց որ մի քանի օր առաջ Նոր Նորքի թաղապետարանում... Ասում եք՝ բռնություններ չկան, բլոգերին ձեր կոալիցիոն գործընկերը 10-15 հոգով դաժան ծեծի է ենթարկում», - նշեց Դանիելյանը:
Քննարկումը բուռն էր, իշխանությունը հիշեց նախկինների պատգամավորների՝ լրագրողներին ուղղված հայհոյանքներն ու սպառնալիքները, ընդդիմադիրները խոսեցին իշխանության այսօրվա անգործությունից:
Իսկ ինչու էր իշխանությունը դեմ ժամանակավոր հանձնաժողովին. ՔՊ-ից Ալխաս Ղազարյանն ուղիղ հայտարարեց. «ԱԺ կանոնակարգով էլ սահմանված է, որ հանձնաժողովի թիվը և կազմը ձևավորվում են խմբակցություններում ընդգրկված պատգամավորների թվի համամասնությամբ: Նշանակում է՝ նման հանձնաժողովը գործունակ չի լինի, քանի որ լինելու է մեծամասնության հանձնաժողով:
Միևնույն ժամանակ, ինչպես արդեն նշել ենք, մենք հիմա էլ նախաձեռնել էլ էթիկայի մշտական հանձնաժողով ստեղծելու գործընթաց»:
Մանրամասները՝ «Ազատության» ռեպորտաժում.
